مأساة تجديد إجازة السوق في كربلاء

تجديد إجازة السوق ذهبت باكرًا لتجديد إجازة السوق بصحبة الأعزاء حجي فؤاد الدبس و Zaidoon Aldeffaee بعد أن أكملنا فحص النظر وسحبنا الاستمارة (المقدسة) .

وصلنا إلى معمل المرور في طريق عين التمر حيث الفوضى العارمة فالمكان في مدخل المعمل عبارة عن مكب للسيارات القديمة وبجانبه مكان لحجز الدراجات المخالفة والوضع كأنه ساحة حرب .

دخلنا واذا الآف الناس موزعين على جملونات المعمل وابتدأ المارثون

١.الحصول على نتيجة الفحص الطبي فهو يذهب بالبريد وعليك أن تبحث عن اسمك في قائمة معلقة بالعراء وتجد التسلسل لتعطيه لموظف يتكلم بالموبايل ولايعير لمناشدتك أي اهتمام.

٢. بعد أن تحصل على النتيجة تذهب لتحصل على فايل بمكان آخر بمسافة ٣٠٠ م تقريبًا تلزم سره ربع ساعة يله تحصل فايل وتدفع مبلغ (٢٥٠٠) قيمته وقيمة استنساخ الهوية وبطاقة السكن والإجازة !!

٣.بعدها توجهنا إلى قاعة وجدنا فيها مئات الناس ينتظرون (تجي الإشارة) شني الإشارة محد يدري وكأنها قنبلة نووية أو شيء إعجازي أذل العراقيين بكل الدوائر (ماكو إشارة) المهم لزمنا سرة نص ساعة وصلنا مفوض شخبط على ورقة وگال روحوا لفلان رحنه لفلان (وجهه مايگصه الطبر) أخذ المعاملة وگال انتظروا مكان الانتظار زين أكو كراسي والقاعة بيهه تكييف .

تقريبًا ساعة صاحوا إسمي يا الله يا الله فرجك طبيت گعدت على الحاسبة الولد عرف رحب بيه وأخلاقه عالية لكن فاجأني بقوله( إستمارتك ضاربة) انصعقت يابه شسوي گال روح بدلهه رحت لزمت سره نص ساعة بدلتهه ورجعت للولد بصمت وگالي روح للتدقيق .

رحت لگيت مقدم حسيت بي وگأنه خالق الكون من گد مانافخ روحة ومتعالي ها يابه فتفضل عليَّ ببضع كلمات من فمه المقدس (ماكو إشارة روح إدفع رسم وإرجعلي)

٤. رحت للرسم لكيت قاعة وبيهه شبابيك وحتى المراجع يگدر يحچي وي الموظف المُقدس لازم يرگع كما في الصلاة فگتله للموظف لو شوية تصعد الفتحة حتى المراجع يرتاح گال ماعلية المهندس هيچ صممهن طبعًا سرة ربع ساعة يله وصلت دفعت رسم (٢١ ألف دينار) ورجعت للتدقيق گال جيبهه وروح تعال باچر على ما تجي الإشارة من لهفتي گتله يعني باچر أستلم الإجازة گال لا محتمل شهر لأن ( الطابعة عاطلة)