(( گلاده حمره ))
كبرت الفرحه اعله گدنه
كبرت الضحكه اعله گدنه
والهلاهل نثت ...
بكل الدرابين الگبل
جانت مظلمه
وبلّلّينَه دروبنه ....
بضويات اهلنه
فاضت الشمعه ....
اعله كل رازونه صوت ....
صوت يرفض
باچر انعيش اعله گوه
صوت بيه ريحة الثورة
اليشهكَ الدخان گوه
اليوم ....
ضحكتنه شكبرهه
اليوم ...
دمعتنه شكبرهه
اليوم .....
زفينه السنابل
مطوگه بلمضة شمسنه
والمناجل...
غصت بصوت الهلاهل
وغاد يم الله
اليتم ليلة عرسنه
رگصت الدنيا
اعله غنوتنه الجديده
وخضرينه ....
(( گلاده حمره ))
لبني ...لبنك ...
باچر ايحطهه اعله جيده
الگصايب ...
تحنت بلون الشوارع
مخضبه بدخااااان
بيه ريحة وطنه
يااا وطنه .....
فرزرن الكحله ولمضهه
يااا وطنه ....
هيه موش نياب
حسبالك لمضهه
الگذله راية
ورايتك بيدك تكضهه
والنثايه ...
تلثمت ب ( اللهُ أكَبر )
حتى يم العاشك
اتَّمّم فرضهه ....
الدروب الصفره چانت
فك حزنهه رّبيعْ اهلنه
خضره خطوات المواگد
شبت بتشرين راي ...
بزود اهلنه
هذا يا تشرين ...
ينزع لون اهلنه ... ؟
ذوله اهلنه.....
صَاغو الثوره اعله گدنه
صدور بيضه
ذوله اهلنه ......
تلگوا الموت
بضحك يروينه فيضه ...
وهيه دمعه ....
وهيه فرحه ....
وباجر انعيش بوطن .....
نجماته بيضه
.................................
سلام الكريزي
٣/نوفمبر/ ٢٠١٩
(ثورة تشرين)