رواية (شرف الاخلاق) * للكاتب - طارق اللبيب - (1)


الحلقة. 1
بقلم طارق اللبيب..
ليس هنالك شرف في نسب ولافي قبيلة . ولافي مال ولاجاه ولاسلطان ..
ولاشرف في جمال الوجه ولاقوة الاجسام .. انما الشرف الحقيقي هو شرف الاخلاق ..
وانما العزة والكرامة لاتكون الا بالصفات التي يتصف بها الانسان .. فهي التي تحدد مقامك حتى بين الناس .
فكم من شريف في نسبه غني بماله .هو عند الله هين مهان ..وكم من فقير عديم هو عند الله اكرم واعز واشرف..
وحتى عند الناس الرجل ترفعه اخلاقه وهي التي تهينه وتذله ..
في هذه القصة الاسم على المسمى ..
والى الحلقة الاولى ..
................
قال ليك في واحد دق الباب لصديقو بالليل زي الساعة 9 مساء ..
وده صديقو العزيز قال ليهو ..
والله يا شرف أنا آسف على ازعاجك في الوقت ده.. لكن محتاج لي مية جنية ضروري شديد..
وأول ما احتجتا مافكرتا في زول غيرك.. اولا انت اقرب زول لي ..وبتحفظ اسراري ..
ومابتبخل علي بالعندك ..
صديقو قال ليهو عارف يا معاذ لو مشيت لزول غيري انا مابقبل . المهم انا هسي مامعاي المية..
لكن بس انتظرني دقايق عندي قروش عند زول اصلو واجيك ..
كان قدام البيت في صبة بتاعة عمود قديم.. قعد معاذ منتظر شرف يمشي ويجيهو .
وشرف طبعا" مشى للراجل الكان عايز منو قروش ..
وقال ليهو والله ياعبدو انا ماكنت بضايقك في الدين.. لكن احتجتا للقروش شديد ..
فياريت تديني منهن ان شاء الله مية .. والباقي بجيك ليهو في وقت تاني ..
عبدو قال ليهو لكن ياشرف دي شنو الحاجة الضرورية المخلياك محتاج لمية جنيه وهسي..؟
الحاصل شنو عليك الله؟ .. احكي لي ..قال له والله حاجة خاصة وضرورية سامحني مابقدر اقول ليك شي ..
بس انت حاول دبر لي الموضوع ..
قال ليهو حاضر عبدو دخل جوه وجاب ليهو الميه.. واداها ليهو قال هاك اتفضل ..
شرف فرح فرح شديد انو حيمشي يفك كربة صاحبو ..
بس لامن مشى شرف .. عبدو مشى وراهو متخفي في الضلام ..
وراقبو لغاية ماسلم القروش لمعاذ الكان قاعد فوق الصبة ..
وسأله قال ليهو .. بس يا معاذ ان شاء الله مافي عوجه ؟ يعني الحاصل شنو ؟..
ان شاء الله مايكون في زول عان ولا حاجه ..
ولو حاجة خاصة ولايهمك ..ولو احتجت لي في حاجة انا جاهز ..
قال ليهو طيب انا احكي ليك .. وبدا يحكي ليهو في سبب حوجته ..
بس معاذ كان صوتو واطي وبحكي بالوسوسة .. وعبدو كان واقف ورا حيطة ما سامع كلام معاذ..
شرف بعد ماسمع القصة من معاذ قال .. لاحول ولاقوة الا بالله ..
دي مصيبة شنو دي .. خلاص امش .. سريع حصل ..
عبدو بقى محروق حراق شديد .. داير يعرف باي طريقة .. الحاصل شنو؟
وطبعا" عبدو زول بتاع فتن وقوايل ..لو عرف اي حاجة ما بتقعد معاهو ..
في ساعات الخبر بكون ملا البلد ..
طيب اول ما معاذ فات.. شرف دخل على بيتو.. وعبدو مشى سريع بالشارع التاني..
وبقى ومتابع معاذ ..عشان يشوف بعينو مادام ماسمع حاجة ..
وفعلا" عبدو الشمار اكتشف الحاصل ..
عبدو بقى متابع معاذ لغاية ما معاذ دخل البيت .. وكانت اختة جات البيت ضربها زوجها على عينها وهي متألمة شديد..
وجات من بيتها زعلانة وعينها محمرة وبتدمع .. ومابتشوف .. وماعندهم قروش يودوها الدكتور ..
كل التفاصيل دي سمعها عبدو من ورا الحيطه .. ورجع البيت سريع ..
وبقى مقلقل لي متين تصبح الواطة ويمشي يكلم اصحاب معاذ بالحاصل .. ويوريهم انو معاذ زول خايب وماقادر يدافع عن اخته ..
وشوف البحصل ..
المهم الصباح طوالي عبدو مشى للشلة.. بقعدو كدا فيي ضل نيمة قريب للسوق بتاع الحي ..
وقال ليهم والله ياجماعة معاذ ده تاني لازم نسميهو معاذ ود هديه .. ماصح نقوليهو معاذ ود خليفه .. عارفين ليه؟
امبارح .. جاني شرف يشحد مني قروش .. قال موديها لي معاذ .. عشان معاذ اختو راجلها دقاها وطردها البيت ..
لكن عليكم الله ياجماعة ماتجيبو سيرتي ..
الجماعة تلاتة اربعة مشو لمعاذ في البيت يكفرو ليهو .. قالو ليهو انتو زوج اختكم ده لازم
توقفوهو في حدو . يعني كيف يضرب البت وانتو ساكتين.. لو ماقادرين عليهو وصفو لينا بنلقاهو وين عشان نربيهو ..
معاذ قال ليهم كدي انتو الكلمكم منو انو حصل كدا ....؟
قالو ليهو .المهم الحلة ملبانة انت مشيت تشحد من شرف 100 جنيه عشان كيت كيت . انت حكيت لمنو غيرو ..
قال ليهم فعلا حقيقة ماحكيت لاي زول الا شرف ..
وتعال شوف الحصل والمشكلة الماليها اول ولا ليها اخر ..
طوالي معاذ مشى لشرف في البيت ..
ناس البيت قالو ليهو من صلاة الصبح ماجا راجع البيت.. ماعارفنو مشى وين ..
وبقى معاذ منتظر شرف ..عشان يوريهو الحنن النملة منو؟..
معاذ انتظر شرف في الشارع ..من ساعة الفطور لغاية صلاة الضهر ماجا ..
المهم معاذ زهج من الانتظار ومشى البيت ..لامن شرف جا قريب العصر .. ناس البيت سألوه كنت وين؟
قال ليهم نحن في الصلاة الامام حاج فلان تعب ووديناهو المستشفى ..
وظهرت ليهو ذبحة وماقدرنا نفوت منه.. الناس كلهم مشى انا ماقدرت امشي ..
لغاية ما افاق واخوهو كان في جبل اولياء جاء.. واصلا الامام ماعندو اولاد ..ومرتو قاعدة في المستشفى تبكي ..
اها انتو مالكم الحاصل شنو؟
قالو ليهو صاحبك معاذ جاء هنا.. زعلان زعل شديد قدر ما استفسرنت منو ابا يورينا ..
وكان منتظرك في الشارع .. قدر ما حنسناهو يدخل على البيت . رفض .
اها مالو يا شرف الزول ده ان شاء الله خير ..
قال ليهم والله انا زاتي ماعارف جاني البارح في موضوع .. والموضوع اتحلا
بس ماعارف الحصل شنو؟
كدي انا قبل ما أعمل اي حاجة ..
النمشي عليهو في البيت ..
الى اللقاء

طارق اللبيب