شوفو اني شكد سامعه قصص بس و روح ابوية مثل هالقصة مسامعه ولا راح اسمع ....
................................

على لسان البنية طبعا ..

تكول اني متت بس الله رجعني للحياة ثاني مرة حتى يكشف الي
صار و يبريني كدام رجلي و كدام اهلي وكدام المجتمع ...

اني تزوجت عن حب .. زوجي او (طليقي حاليا) تعرفت عليه بوقت الدراسة ..
جنا اني وياه منفارق بعض .. وصلنا لدرجة من الحب الي هي كل الي يحبون يعرفوها ..
من نظرة العين و من نبرة الصوت واحد يعرف الثاني شيريد و شبي ..
حبيته و عشقته و حبني وعشقني ...
4 سنوات هو عايش بداخلي واني عايشة بداخلة ..
تزوجنا بعد مجموعة من المشاكل بينه و بين اهله .. لان امه و خواته جانو يريدون يزوجوه بنت خالتهم الوسطانية ..
بس هو مقبل بحجي امه وخواته و رفض الموضوع و حلف ميتزوج غيري ..
تخرجنا ثنينا و تزوجنا ..
الولد جان ناوي يطلعني بمشتمل وحدي بس امكانيته مجانت تسمح و اهله مقبلو ينطوه بسبب كسر كلامه الهم ..
كعدنا وياهم ..
مراح اكول حاربوني بالبيت و شوفوني انواع الذل و المهانة لان اي وحدة بمثل سالفتي حاسة بالموضوع وراح تفتهمه و تعرف شلون يتصرفون اهل الولد وي البنية الي رافضين ياخذها ...
من جان يطلع و يروح لشغلة تبدي سوالفهم .. داسو بمصاريني و جنت ابد ما احجي ...
استمريت على هالحال اشهر .. و كله يهون لأجله و جنت ابد ما اكله هيج وهيج سوولي اهلك حتى لا تصير مشاكل ..
تحملت و بكلشي رضيت بس علمودة ...
الى ان اجه اسود يوم بحياتي و انكس يوم بحياتي الي غيرلي حياتي كلها ..
اجه رجلي من الشغل مثل كل يوم ..
و كعد شوية جوى و بعدين صعد لغرفتنا دنام ..
تمددنا اني وياه سوية عالفراش و بقينا نسولف مثل كل يوم ..
صار صوت بالغرفة .. ززززز .. ززززز ..
صوت شي ينهز ...
كالي دسمعين هالصوت !!
كلتله اي ؟
كال هاي صوت تلفون هزاز يمكن ..
تلفونج وينه !!
كلتله هذا وجان امد ايدي على الكومدي الي بصف راسي وناوشته التلفون ..
كالي لا هذا غير تلفون الي ديدك ..
جان يكوم و راح بصف الكنتور و مد ايده على الكاع بحوش جان يطلع تلفون من جوى الزولية الي بصف الكنتور كلش ..
شتتوقعون بي التلفون ..
بي سم كارت و بي انترنت ..
بالسم كارت بس رقم واحد مكتوب عليه (حبيبي) ..
و حساب مال فايبر واحد ..
بي محادثات و صوري ..
يعني محادثات عبالك اني داحجيها وي شخص ثاني ..
و دازتله صوري و كله حبيات بيني و بينه ..
و محادثات كومة بعد ..
من شاف المحادثات و الحجي بالقلم العريض بيني و بين (الحبيب الوهمي) و كومة صور دازتله .. كبل خنكني و دك بوكسيات و يصيح ويغلط انواع الغلط ..
اكو سجينة على الميز هاي مرات جنت اصعد برتقال بماعون للغرفة اكشر و اكل و اباع تلفزيون ..
جرها و ضربني بيها بجتفي ..
طبعا من شاف الدم صحى على نفسه و بهل الحجي امه فاتت على صياحي و صياحه وغلطه ..
مو شافت دم و عبالها متت ..
لان اني خلص فقدت الوعي و بعدين عرفت الي صار ..
كامت تلطم و تكله خواتك سوو هيج ليش كتلتها ... يمه ابني راح يعدموه و تلطم وتبجي و تتفل (مكرم القارئ) على خواته لان هم جوي للغرفة ..
هو هم فقد من شافني مغسولة بدمي و عباله متت ..
همزين بذاك اليوم ابن خاله بالبيت بايت .. لان ابن خاله متزوج اخته الجبيرة و ساكنين بأربيل هو و زوجته ..
جانو جايين زيارة اسبوعين تقريبا ..
اخذني اني ودمي للمستشفى و لحكو عليا و خيطولي الشك مال سجينة و عالجوني ..
( بالمناسبة اخته الجبيرة ابد مالها شغلة بلي ديصير ومتعرف اصلا شنو السالفة )
و سبحان الله ابن خاله يصير اخو البنية الي يريدون يطلكوني حتى يزوجها ...
طلعت السالفة شنو ..
خواته متفقين يخربون بس محاجين لأمهم شلون راح يخربون ... و امهم قابلة بس معبالها راح توصل السالفة لهل الدرجة و يصير بيها دم ..
و هاي من شافت دم و اني ميته بمكاني ..
خلص بعد فقدت والله فتح لسانها حتى يبين كلشي ..
شطلعو مسوين الحقيرات خواته ..
جايبين جهاز تلفون و شوفو التخطيط الي محد يكدر يكشفة ..
و سم كارت جايبين .. و مسوين حساب و يحجون من تلفونين وحدة وي الثانية بحجة اني و (حبيبي) الي داخونه وياه ..
ومن اني ملتهية بشغل البيت جايبات التلفون و مسوينه صامت و ضامته بمكان ميبين ..
حتى شنو !!
حتى من يجي بليل يدكون و يدكون و ينهز وهو راح يسمع و اكيد راح يدور عالجهاز ..
و يصير الي يصير ..
بس سبحان الله .. صح اني انضربت سجينة و صح شفت الموت بس الله كشفهم ..
مخلص الحجي ..
الكل عرف بالموضوع حتى ابن خاله عرف بالحقيقة ..
وراها ..
هو كسر ايد وحدة من خواته والثانية انهزمت وي اختها لأربيل ..
و امه ميحجي وياها لليوم ..
و اني كبل من المستشفى لبيت اهلي و كبل طلبت طلاق و اخوتي رادو يذبحوه لو مو ابوية ما قبل و يخافون من ابوية كلش ..
طبعا ابوية و اخوتي رادو يسون كعدة و فصل و الشغلة تكبر ..
بس اني رفضت لان بعد شيفيد !!
بس اريد افتهم شنو فائدة الفصل و اني تطلكت ومالي نفس بعد بالزواج ..
والله العظيم كرهت شي اسمه زواج ..
شنو فائدة الفصل واني مستقبلي انهار !!

اني متت والله متت بيومها .. يعني الضربة لو ضاربني بركبتي و ميته مو جان هسة اني بنظر المجتمع واهلي هيج مسوية .. مو جان صارت السالفة غسيل عار و عادي جان الناس شافو التلفون و المحادثات و يجوز جان انشهرت السالفة عالمواقع الاجتماعية و الي يغلط و يكول هاي ساقطة (مكرم القارئ) وهاي زانية و هاي وهاي وهاي وهاي !!
مو لو مو مو !!
مو احتمال جان طلعت سالفتي عالتلفزيون والناس تدز مسجات ويكولون هاي ممربايه ؟؟
مو جان الناس كتبت هاي بنت حرام !!
مو جان الاخضر و اليابس نهش عرضي واني كل شي ممسوية و مجرد ضحية !!
بس رغم كل شي الله طلع الحق ..
و الحمدلله ..
صح تطلكت و صح كرهت الزواج وصح هسة يوميا الليل ما انامه و اخذ حبوب علاج مال نفسية ..
بس احمد الله و اشكره مليون مرة بانت الحقيقة و ما سودت وجه اهلي كدام الناس والمجتمع من شي اني ممسويته اصلا !!
و الحمدلله على كل حال ..
(مظلومة)