دارميات محبة وغزل

[اسماعيل القريشي]

دارميات محبة وغزل

ماشايف بدنياي رقة وترافة
ومورَّد الخدين تكتل شفافة

البصرة تزهي وحيل اشرقت الانوار
من طلعتك يهواي حتى الگمر غار

حلوه وجمالچ توب وشكبره بختچ
اكتب غزل ديوان ما اوفي شفتچ

امتلك كل الكون لمن تقبلين
مني المحبه اليوم واشلعلچ العين


شلون انسى حب منقوش بالگلب للدوم
حتى من اموتن حيل ماينمسح يوم

كل ما اريد انساچ گلبي يتفطر
حبچ يبعد الروح نقش اعلى مرمر

ماشايف بدنياي مثلچ هديه
حلوه وحسن واخلاق ميه بالميه

هسه انه افرح حيل من احچي وياك
بالگبر گلي شلون اتسامر وياك

خلي الگلب مهموم من اجل الاحباب
افديهم انه الروح وانطم بالتراب

ما يعرف الوردات الا المثلهه
لا والله انتي هواي تسويهه كلهه

والله الجمال البيچ ايصفن الكون
كل عمري اضل مفتون ابهاي العيون

إسأل على الاخلاق والعفة والذوق
مو عل شكل والجاه كل هذا ميروق

هذا الحسن بي لون مو كل الالوان
سواچ رب الكون مثلچ فلا كان

محتار اقدم شي عيديه بالعيد
هاچ الگلب اخذيه ها بلكت ايفيد

ينعم اله الكون على كل عباده
وانتي رحمتي وبيچ نعمه وزيادة

كل الحسن بالكون حاويته واكثر
من شوفتچ لليوم امشي واتعثر

ماعنده ذرة ذوق كلمن غدر بيچ
لو عندي والعباس بگليبي اخليچ


الشاعر اسماعيل القريشي

المصدر: منتديات عراق الخير والمحبة - من قسم: منتدى الشعر الشعبي