دروس

[اسماعيل القريشي]

قصيدة دروس

قصيدة دروس
مو كلمن درس يگدر ايحاچي الناس
بعض الناس تدرس مو شرط واعين
اكو بيهم اليقرا ويجهل المضمون
وبيهم علماء وحيل متفقهين
اكو بيهم دماغه ابئيد هذا وذاك
ماترهم سفينه وبيهه ربانين
بيهم يزعل ويسمع كلام الناس
ميصدك كلامك صدگ الواشين
وتگله غلط لاتاخذ بهل راي
ميصدگ لون تحلفله ميت يمين
تسكت تبتلي الف عليك ضنون
من گلبه وخذاهن مستند بعدين
احمق مايهمه العدل والانصاف
متمسك برايه وتيه الصوبين
اكو بيهم يحذرك من شخص معروف
تالي يرافگه وينطيله ماي العين
من هاي النماذج تركه وتلاشاه
والعاقل الفاهم حطه وسط العين
واليحچي وراك اتجاهله وانساه
لان گبال وجهك ساكت ومسكين
اطباع البشر ما تنعرف بالگول
بالافعال كل الناس متقيمين
ماتگدر اتصدگ كل كلام الناس
اذا چانو احبابك يوم غلطانين
بعض الاصدقاءافكاره بيهن سوء
ويريدك برايه اتطبق بكل حين
اكثرهه المشاكل تجي والاحقاد
لن كلمن برايه تشوفهم باقين
لتزغر بشر واحترم كل الناس
ربك كامل او كل احنه محتاجين
لا تفضح بشر لو شفت منه عيوب
استرهه ترى من الباري متوصين
اصلك من ضعف بالقوة لاتغتر
لا تنسى البشر مخلوق من الطين
السكته عبادة اتجنب اليحچون
اذا بالغلط ويه الخلگ معروفين
لا تغلط وتحمل ذلة الاعذار
ويه الناس گوه تشوفهم راضين
راحت بالك اشريهه بأعز الاثمان
تشعر بالسعادة وتستقربعدين
الشاعر اسماعيل القريشي

لمشاهدة القصيدة اضغط هنا

المصدر: منتديات عراق الخير والمحبة - من قسم: منتدى الشعر الشعبي