صباحج يا بغداد مو مثل الصباحات

[نبض العراق]

صباحج يا بغداد مو مثل الصباحات

صباحج موت من دون الصباحات
صراع ال عالكراسي نزل عالروس
وطش فوق الصبح كومة انفجارات
صباح الموت يا ام المساكين
يا دجلة الخوف ونهر دمعات
يشعلونج حطب لو تبرد الخضراء
وتدفى عليج ام العصابات
لان لازم جماجم للعرش كون
ما يكعد الكرسي بلايا صرخات
امبين يا حبيبة كتالج وذاك
يا هو من ولدج يصرخ الثارات
سيارات الاسعاف تفخخت واطفاء
مو كافي الكواتم مو كافي عبوات
هاي ام تلم ببنها وهذه اب
كسر ظهره دهره وابنه المات
هاي زهور ما فتحت هاي عيون
نامت عالجمر وعالهموم تبات
رضت بالضيم تعيش بس كونها تعيش
وحرموها حتى تعيش والعمر فات
صباح الموت يا حلوة تحترقين
لان محد الج يا وسفة وحرامات
حاميج الحرامي وحارسج كتال
اشندعي مو زرفنا السما دعوات ؟

المصدر: منتديات عراق الخير والمحبة - من قسم: منتدى الشعر الشعبي