ثلاث قصص حب

[العربودي]

ثلاث قصص حب

المقدمة

قصتي قصه طويله بيهه اسرار ومخافي

عشك عذري وعشره وهموم وتجافي

اوفرحه وجروح ومحنه ودمع يجري علجفافي

اوبيهه شمات وخيانه اوزفه وحجايات اضافي

واسمع اهنانه البدايه تلاثه حبيت بشبابي

ومالكيت الي توافي ومنهي يبنادم توافي

الاولى.... بشرى

بشرى تلث اسنين احبهه وبشرف جانت اهدافي

وعاشرته بروح طيبه وبكلب مخلص وصافي

ووهبتهه العمر كله وكلت هيه هاي الي توافي

اوثاني يوم ادزلي اختهه وتكلي انتهه حبنه اوكافي

لاتجيني ولااجيك ولابعد توصل اطرافي

وحنيتلهه وتاه فكري ويبسن الجلمات على اشفافي

وكتبتلهه رساله وكلت شنو ذنبي اموت علتجافي

وين كل ذاك الحب يبشرى اوين كعداد الفيافي

وين حجيج بلمحنه اوين كل ذاك الوعد يلكتي اوافي

وانتظرت وماردت جواب علرساله وخلص عمري لاني كاعد لاني غافي

اوثاني يوم اطلع ولاكيهه ويه واحد مدري منين لافي

لن وجهه اديره عني وجنهه ماتعرف اوصافي

لن كلبهه حجر صاير جنه تمثال الرصافي

اوكتلهه لكيتيلج ولف ثاني الف مبروك وعوافي

ياحيف والف وسفه تلث سنين ضيعته بحب خرافي

وتاليه رديت بحصرتي اولوعتي اوتتراجف اطرافي

ومنهي يبنادم توافي

.........................

الثانيه...فاتن

وفاتن خمس سنين احبهه وروحي بيهه تعلكت

وبعشكهه هام الكلب وسلوتي هيه صبحت

ويامه تساهرنه وعلى رجليه غفت

ويامه اديهه ويه اديه تشابجت

وحلفت وكالت ابد ماخونك حتلو اديه تكطعت

وبقه طول العمر احبك مهمى الوادم حجت

وكلت هيه هاي الي توافي وصدك حبنه ضل فد وقت

ورحنه نخطبه منهله لاكن امه المارضت

وكلت ميخالف يكلبي موش من هاي وكظت

وردت بس الاكيهه واكلهه ليش امج عارضت

ومرت شهور وليالي وفاتن شو مابينت

ومرت شهور وفاتن شو لارساله ولاوصيه منهه اجت

وسئلت رجاء عنهه وكالت يمكن سافرت

وكامت الحسبات تاخذني لمن كلبي هفت

ساعه اكولن خافن فاتن تمرظت

اوساعه اكولن خافن اهلهه الماخلوهه اجت

وايست وصدفه مريت بفرعهم وشفت سيارات يمهم جودرت

والناس ملتمه علباب الحوش والصفكه علت

وسئلت واحد صديقي وكتله هاي ياهي العرست

ويكلي ماتدري هاي فاتن الي تحبه اتزوجت

وكتت عيوني بدمعه بسكته وضلوعي نحنت

وكلبي تاه بدرب اظلم وشكثر روحي تمرمرت

هيه الي ضيعتني بسهم مسموم بكلبي وجرت

عليه هيه الماهزهه الظيم ولعد غيري مشت

وانه خمس سنين احبه وانه خمس سنين من عمري كظت

راح كل عمري التلفته وراح كل تعب التعبته وهاي تاليه صفت

ومنهي يبنادم توافي...

............................

الثالثه..ازهار

وازهار تلث سنين احبهه وسكنت نبض الكلب

ولون تدري شكد احبهه وحبهه زاد علكل حب

وكلشي ظحيته لئجلهه وعلنت ويه اهلي حرب

لزاعلت وياهه فد يوم ولا قسيت عليهه بحجايه وظرب

جنت اتعنه لحيهم ولعد بيتهم اطب

وجانت تحبني وغصب على كل اهل الدرب

وجانت تكلي احبك والفراك شكد صعب

وتدري يوم المااشوفك بيه اضل سهرانه ودموعي تصب

واني هواي احبهه والله شاهد علكلب

وجنت اتئمل توافي لو شمرني الوكت بديار الغرب

لاجن حسابي طلع مكلوب وبعيد الدرب

وصبحت مثل الكصاب وتولت بكلبي كصب

ساعه تكلي احبك ساعه تهجر ساعه حيه تنكلب

وردت بس احاجيهه ورحت فد يوم والمطر حالوب وعليه يصب

لنهه علباب تلاكيني وتكلي لاتجيني ولالينه تطب

والرسايل دزهن اليه وذيج الكتب

وانت رد ردود الئهلك والهدايه طشهن باادرب

ولا تجيني ولاتكول احب ازهار وانتهه موسم الحب

ومنهي يبنادم توافي................

اخوكم
العربودي العنزي

المصدر: منتديات عراق الخير والمحبة - من قسم: منتدى الشعر الشعبي