قصيــــــــــــــــــــــــــده

بسم الله الرحمن الرحيم

ياناشــــدٍ عن الزكاريط وش صار
حزّة الضحى والقوم خيل ورجاجيل
وارعد سماها وابرقت والدخن ثار
وصالوا وصلنا بالطنايا المشـــاكيل
عشّاقة الموت الحمر باللقا الحار
صبيحــــات دايم كاسبين التنافيل
صرصار عاتي ع المغيرين صرصار
شهب النيازك عً المعادي وسـجّيل
في عركةٍ قد شبـــهوها بذيقار
ولابدّلوا قوش السناعـــــــيس تبديل
ربعي هل الطولات ونحاز وذعار
للخيل ربعـــــي وعً المعــادي غرابيل
ربعي الضياغم من ضنى عمير واعرار
للضـد ضـد ولصــدقاهـــم مــداهيل
خيالنا وســـــــــــــط الميادين زئّار
ماتاخذه بالضد رحمه وتواسيل
وكم شوق رعبوبٍ من القوم مقوار
من سرجها حوّل على الراس تحويل
وكم غروةٍ بصدورنا شوقها طار
واخيول ربعه مدبراتٍ مجافيل
وصاحت عليه وهلّت الدمع بعبار
وعقب الهلاهل بدلتها ولاويل
وسيوفنا تقطف بهم قطف نوّار
لعيون عين اللي هدبها مظاليل
والحوم يتبع والغلامين نثّار
وراح اعقداهم هاربينٍ مهابيل
وحلّت كوارث عً المغيرين واعصار
من دون شرح ومفردات وتفاصيل
والبيض جالن واندبن سيد الاحرار
وله طوّحن حمر الهباري وهلاهيل
صاحن فهد يللي للخيل نحّار
عزّ العذارى لابسات الخلاخيل
قال ابشرن يالبيض والرب ستّار
في ساعة الهيجا ويوم التهاويل
وللسيف شرّع الفهد والفهد صار
قصاب لرقاب الفحول الحلاحيل
ولون الحمر بذباب سيف تقل نار
من دم ضده وعدّل الحمل تعديل
صنديد مثله من الصناديد ماصار
لاجيل راح وجيل ياتي ولاجيل
هذا الدّويخ مانشد قل واكثار
كبّر وقال الله عليه التساهيل
ثلاث مهارٍ مابها كذب ونكار
تجندلن حدر الفهد .. والمضاليل
قالن فهد ستر العذارى وابيطار
حامي حمانا وحامي الدار والحيل
مجربٍ من ساس قومٍ لهم كار
بساحات مجدٍ والسيوف المصاقيل
شيوخ قومٍ مابهم كل هذّار
برباعهم تلقى الدّلال وفناجيل
قادوا زكاريط الطنى وقت الاخطار
ووقت الرخا يمرح بها كل هرميل
ونعمين من عبهول من ماكر اوكار
صقورٍ بساحات الوغى له تماثيل
حرٍ قطوعٍ عً الصعيبات صبّار
صلّه على الموت الحمر دون تمهيل
ماهاب جمعٍ والوطى والسماء نار
ارخى الرّسن قال ابشرن يالمظاليل
مثل النداوي اربش الريش لاطار
يقلل خطاة الصيد من الضرب تقليل
عز البناخي من ثنى بحزم ماشار
اهديب يبرك للصعيبات وايشيل
الله يغمره برحمته بجمع الابرار
بجنان خلدٍ مابها قايل وقيل
تاريخنا يبقى على الدوم تذكار
ماهي قهاوي وكهكهات وتعاليل
ماهي سوالف لو رباريب عقّار
قف ! .. يالفهيم وحلّل القول تحليل
حنا الطنيا صيتنا بكل الاقطار
في حايل الشماء .. بالشام واربيل
وعُمان واسطنبول .. لندن ودكّار
والبيت الابيض .. حيدر اباد والنيل
وفي تونس الخضرا لنا اقراب وانصار
وبعلومنا سارت بوارج واساطيل


بقلم الشيخ منديل نواف المغامس