نسيتك وانتهه كلشي ويــــــاك
وبعد اثار حبك مااحس بيهــــن

وطيبت الجروح البيه خليتهــــن
وبديت جروحي بأبعادك اداويهن

لملمت دمعي وحلفت انســاك
وكل صفحات العشك وياك أطويهن

واذا ضنك لاويتني بخيانتك هاي
اني اصلا ادينك من كبل لاويهن

ادك بيبان الوفه ارد اسأل عليك
يفتحلي باب الغدر والكاك ماليهن

شكم ليله مرت بالحزن وحدي
وتخيلتك سمج بالبحر صايديهن



علمت نفسي على فراكك دوم
وكتله يا كلبي نيرانك اطفيهن

وحلمت بدنيه سعيدة انته مو وياي
وفرحت باحلامي لان صورتك مابيهن

واذا شفت الليالي ردتك فد يوم
اوصيك سلملي عليهن من تلاكيهن

واذا مريت للاشجار الجمعتني وياك
سميتهن بأسمك أمسح اساميهن

تذكر من جنت اغنيلك اغاني الشوك
بعد ارجوك ماريد بصوتك لا تغنيهن

وطيور الحب لا تنسه توكلهـــــن
وشكد ماتكدر اريدك دوم تداريهن

وفن ليه وانته حبيبي وما وفيت
ونكرت كل خيراتي الجنت اسويهن

نسيتك بعد ومات حبك بكلبي
وبديت طعناتك بضهري اشافيهن

حرامات الكمر شكد سهرته وياي
والنجوم الي ربك بالسمه محليهن

فرحن من عاينني اضحك وياك
وصدكوا ضحكتك تتمضحك عليهن

حاولت اذكر حروفك ماطلعن وياي
عاندني لساني مايرضى احجيهن

من شفتك كبل مثل ورده وياي
عفت الورد كله وماشميت بيهن

ومن شفتك تهدم الي بنيته وياك
بعد دمرت الليالي ليش اني ابنيهن

وحتى الايام المره ماتت اليوم
وبقت ايام حلوه اني احييهن

اسأل كلبك هم عرف يوفي وياك
علمه بس يوفي وخطواته يمشيهن

صحيح بجيت من شفتك تــــــروح
وبديت دموعي بخدودي ارثيهـــن

عبر عندي الدمع فوك الجفن وياي
وحاولت اوشل بدموعي واجفيهن

وبدل ماابجي فكرت اضحك اليوم
نزلت دمعات الفرح وهلهلت بيهن

وجلبت بأمل ارجع من جديد اوكف
وانسه عشرتك وطيوفك امحيهن

واذا عاينت اصابيعي دكت البيبان
اني اقسم بربك اله اجويهـــــــن